Բռնություն՝ ցմահ դատապարտյալների նկատմամբ. ի՞նչ է հայտնի «Նուբարաշեն» ՔԿՀ-ում տեղի ունեցածի մասին
«Նուբարաշեն» քրեկատարողական ծառայությունում ցմահ դատապարտյալների հետ կապված միջադեպ է տեղի ունեցել: Իրավապաշտպան Ժաննա Ալեքսանյանն է առաջինն ահազանգ հնչեցրել դեպքի մասին։ Իրավապաշտպանը տեղի ունեցածը «դատապարտյալների ջարդ» էր որակել:
«Ինձ ասում են, որ դատապարտյալները արյունլվա ընկած են և որևէ բուժօգնություն չի ցուցաբերվում։ Հարցնում էին՝ ի՞նչ ենք արել, ինչի՞ համար։ Սա ի՞նչ ջարդ է։ Ում հրահանգով են ջարդում այդ մարկանց։ Տեղյա՞կ է Արդարադատության նախարարության տիրուհին, որ փակված անպաշտպան մարդկանց են ջարդում։ Թշնամին գրավել է երկիրը։ բռնություն է շուրջ բոլորը։ Ես արդեն ահազանգել եմ Պաշտպանի գրասենյակ, նրանք պարտավոր են հենց այս պաին այցելել ցմահ դատապարտյալներին և հայտարարությունով հանդես գալ»,-գրել է իրավապաշտպանը:
Տեղի ունեցածի վերաբերյալ իր ֆեյսբուքյան էջում պարզաբանում է տարածել Նուբարաշեն ՔԿԾ-ի մամուլի խոսնակ Նոնա Նավիկյանը:
«Քրեակատարողական ծառայությունում ստացվել էին տեղեկություններ այն մասին, որ «Նուբարաշեն» քրեակատարողական հիմնարկի դատապարտյալներից մեկը, նպատակ ունենալով ձեռք բերել առավելություններ այլ ազատազրկված անձանց նկատմամբ, տևական ժամանակ է՝ խաթարում է հիմնարկի բնականոն աշխատանքը, պարբերաբար ներկայացնում է անօրինական պահանջներ և հրահրում այլ ազատազրկված անձանց նույնպես ներկայացնել նման անօրինական պահանջներ։
Հիմնարկի ծառայողների կոողմից անհնազանդության կոչը դադարեցնելու հրամանին չենթարկվելու համար հատուկ նշանակության բաժնի ծառայողները «Նուբարաշեն» քրեակատարողական հիմնարկի ծառայողների հետ համատեղ ձեռնարկել են հատուկ միջոցառումներ ազատազրկված անձանց կողմից ներքին կանոնակարգի խախտումները վերացնելու ուղղությամբ։ Ֆիզիկական ուժի գործադրմամբ վերջիններս դուրս են բերվել խցերից, իսկ խցերում իրականացվել են խուզարկություններ։ Կատարված գործողություններից հետո երկու դատապարտյալ հայտարարել է հնարավոր կոտրվածքների մասին, սակայն հիմնարկի բուժանձնակազմի կողմից իրականացված ռենտգեն հետազոտության արդյունքում վերջիններիս մոտ կոտրվածքներ չեն հայտնաբերվել»-գրել է նա։
Դեպքին արձագանքել է Մարդու իրավունքների պաշտպանի գրասենյակը՝ տեղեկացնելով, որ միջոցառումներ են ձեռնարկվել դատապարտյալի իրավունքներին պաշտպանության վերաբերյալ։
«Պաշտպանի հանձնարարությամբ «Նուբարաշեն» քրեկատարողական հիմնարկ է մեկնել արագ արձագանքման խումբ՝ տեղում բարձրացված խնդիրների մանրամասներին ծանոթանալու, ցմահ ազատազրկման դատապարտված անձանց հետ առանձնազրույց ունենալու նպատակով:Պաշտպանի աշխատակազմում ուսումնասիրվում են նաև նշված դեպքի վերաբերյալ հրապարակային նյութերը»-ասել են ՄԻՊ գրասենյակից:
