Ուկրաինայի զինված ուժերը հարվածել են Զապորոժիեի ատոմակայանի արբանյակ-քաղաքի՝ Էներգոդարի էներգահամակարգին, ինչի հետևանքով քաղաքի մի մասը հոսանքազրկվել է։ Այս մասին Telegram-ի ալիքում գրել է Ռուսաստանի Դաշնության Հանրային պալատի ինքնիշխանության, հայրենասիրական նախագծերի և վետերանների աջակցության հարցերով հանձնաժողովի նախագահ Վլադիմիր Ռոգովը։
«Ուկրաինայի Զինված ուժերը նպատակաուղղված հարվածում են Զապորոժիեի մարզի էներգետիկների գլխավոր քաղաքի էլեկտրացանցերին և էլեկտրահաղորդման գծերին։ Նացիստների կողմից հրետակոծության հետևանքով երկու միկրոշրջանների՝ երկրորդի և երրորդի, բնակիչները մնացել են առանց էլեկտրականության։ Գնդակոծությունը շարունակվում է»,- գրել է Ռոգովը։
Նա քաղաքի բնակիչներին կոչ է արել լինել ուշադիր և չլքել ապաստարանները։
