Ասադների ընտանիքի արտասահմանյան ակտիվների «որսը» սկսված է. WSJ

Սիրիայում Ասադի ռեժիմի փլուզմամբ մեկնարկել է համաշխարհային «որսը»՝ այն միլիարդավոր դոլարների համար, որոնք ընտանիքը կուտակել և թաքցրել է կեսդարյա բռնապետական իշխանության ընթացքում, գրում է The Wall Street Journal-ը՝ մանրամասնելով, որ իրավապաշտպան իրավաբանները  նախատեսում են գտնել այդ ակտիվները, որպեսզի «վերադարձնեն դրանք Սիրիայի ժողովրդին»

Այս գործընթացը, ամենայն հավանականությամբ, երկար կտևի՝ հաշվի առնելով Սադդամ Հուսեյնի և Մուամար Գադաֆիի արտասահմանում թաքցրած հարստության վերադարձի տարիներ տևած փորձերը, գրել է պարբերականը:

Ասադի ընտանիքը վերջին տասնամյակների ընթացքում ձևավորել է ներդրումների և բիզնես շահերի լայն ցանց, որը սկիզբ է առել ընտանիքի ղեկավար Հաֆեզ ալ-Ասադի կողմից 1970 թվականին իշխանության զավթումից հետո։ ԱՄՆ նախկին պաշտոնյաների, իրավաբանների և հետազոտական կազմակերպությունների տվյալներով՝ Բաշար ալ-Ասադի մերձավորները, ով արդեն տապալված ղեկավար է, տարիների ընթացքում ձեռք են բերել մեծարժեք անշարժ գույք Ռուսաստանում, հյուրանոցներ Վիեննայում և մասնավոր ինքնաթիռ՝ Դուբայում։

«Կսկսվի ռեժիմի ակտիվների միջազգային «որսը»», – ասել է Էնդրյու Թաբլերը՝ Սպիտակ տան նախկին պաշտոնյան, ով աշխատել է Ասադի ընտանիքի ակտիվների բացահայտման վրա՝ ԱՄՆ պատժամիջոցների շրջանակում։

«Նրանք երկար ժամանակ ունեին հեղափոխությունից առաջ իրենց գումարները «լվանալու» համար։ Նրանք միշտ ունեին Բ պլան և այժմ պատրաստ են աքսորի կյանքին»։

Վերլուծության համաձայն՝ գումարի զգալի մասը ձեռք է բերվել պետական մենաշնորհների և թմրանյութերի վաճառքի, մասնավորապես «կապտագոն» ամֆետամինի արտադրության միջոցով։

Ասադների ընտանիքի հարստությունը շարունակում էր աճել այն ժամանակ, երբ շարքային սիրիացիները դժվարանում էին հաղթահարել 2011 թվականին սկսված քաղաքացիական պատերազմի հետևանքները։ Համաշխարհային բանկի տվյալներով՝ 2022 թվականին Սիրիայի բնակչության գրեթե 70%-ն ապրում էր աղքատության պայմաններում։