Եվրոպական երկրների առաջնորդները պատրաստվում են մեկնել Վաշինգտոն՝ մասնակցելու Թրամփ-Զելենսկի հանդիպմանը
Եվրոպական մի շարք պետությունների առաջնորդներ երկուշաբթի կմեկնեն Վաշինգտոն՝ մասնակցելու Թրամփ-Զելենսկի հանդիպմանը. փոխանցում են եվրոպական լրատվամիջոցները՝ հղում անելով պաշտոնական հայտարարություններին:
Գերմանիայի կառավարության հայտարարության համաձայն՝ կանցլեր Ֆրիդրիխ Մերցը եվրոպացի այլ առաջնորդների հետ կմեկնի Վաշինգտոն՝ քննարկելու ուկրաինական ճգնաժամը և աջակցությունն Ուկրաինային.
«Ի թիվս այլ հարցերի՝ կքննարկվեն անվտանգային երաշխիքները, տարածքային հարցը և Ուկրաինային աջակցության շարունակականությունը՝ պաշտպանելու այն ռուսական ագրեսիայից. սա ներառում է պատժամիջոցների ճնշման պահպանումը», – հայտնել է Գերմանիայի կառավարությունը։
Հայտնի է նաև Ֆինլանդիայի նախագահ Ալեքսանդր Ստուբի մասնակցության մասին:
Ելիսեյան պալատը ևս հաստատել է, որ նախագահ Էմանյուել Մակրոնը Զելենսկիի հետ կմեկնի Վաշինգտոն: Ինչպես հայտնել են Իտալիայի վարչապետի գրասենյակից, այնտեղ կմեկնի նաև Ջորջա Մելոնին:
Մեծ Բրիտանիայի վարչապետ Քիր Սթարմերը ևս նախատեսում է մասնակցել Թրամփ-Զելենսկի հանդիպմանը. հայտնել են Միացյալ Թագավորության կառավարությունից:
Բացի այդ՝ հանդիպմանը մասնակցելու մասին է հայտնել Եվրոպական հանձնաժողովի նախագահ Ուրսուլա ֆոն դեր Լայենը.
«Նախագահ Զելենսկիի խնդրանքով վաղը կմիանամ նախագահ Թրամփի և եվրոպացի առաջնորդների հանդիպմանը Սպիտակ տանը», – գրել է նա X սոցցանցի իր էջում:
