ԱՄՆ պատմության ամենահարուստ նախագահի հյուրերին մատուցվել է ինքնաթիռում մատուցվող ուտելիքից էլ ավելի վատ ուտելիք․ ԶԼՄ-ներ

ԱՄՆ նախագահ Դոնալդ Թրամփի մեմքոյններ գնելու համար միջինում մոտ 1.8 միլիոն դոլար ծախսած կրիպտոարժույթների միլիոնատերերը տհաճ անակնկալի են եկել, երբ այդ առիթով կազմակերպված ընդունելության ժամանակ նրանց «ինքնաթիռային ուտելիքից» ավելի վատ սնունդ են մատուցել․ գրում է The Daily Telegraph (DT)-ը։

Հրատարակության տվյալներով՝ Վիրջինիայի նրա գոլֆի ակումբում «բացառիկ» միջոցառմանը մասնակցած գործարարները «քննադատել են Թրամփի պաշտոնական կրիպտոարժույթի գնորդներին մատուցվող սնունդը։ Միջոցառումը, ըստ գնահատականների, ԱՄՆ նախագահին և նրա ընտանիքին բերել է 148 միլիոն դոլար»։

Հյուրերին Թրամփի լոգոտիպով ափսեների վրա մատուցվել է այսպես կոչված «տապակած պալիբուտ ցիտրուսային սոուսով, ֆիլե մինյոն դեմի-գլասով»։ Սակայն ուտեստների տեսքը և բանջարեղենի չնչին քանակը բացասական արձագանք են առաջացրել ընդունելության մասնակիցների շրջանում։ Նրանցից մեկի խոսքերով՝ «միակ լավ ուտելիքը հացն ու կարագն էր»։

Մեկ ուրիշը նշել է, որ նույնիսկ ամերիկյան Spirit Airlines բյուջետային տուրիստական ընկերության ինքնաթիռում մատուցվող ուտելիքն ավելի լավն էր։

Միևնույն ժամանակ՝ The New York Times (NYT)-ը հայտնել է, որ ԱՄՆ նախագահ Դոնալդ Թրամփի ընտանիքը ֆինանսապես իր դիրքից ավելի շատ է օգտվել, քան նրանից առաջ եղած որևէ այլ առաջնորդ։

Պարբերականի տվյալներով՝ Դոնալդ և Մելանյա Թրամփերը միայն «կրիպտոարժույթներով և մեմքոյններով մանիպուլյացիաներից» վաստակել են 320 միլիոն դոլար՝ չհաշված արտասահմանում անշարժ գույքի ակտիվները և Վաշինգտոնում գտնվող ակումբը, որի անդամակցությունը կազմում է 500 հազար դոլար։ Քաթարի կառավարությունը Թրամփին նվիրել է 200 միլիոն դոլար արժողությամբ անձնական Boeing 747 ինքնաթիռ, որը ԱՄՆ պատմության մեջ ամենաթանկ նվերն է։

Թրամփը նորմա է դարձրել իր նախագահական կարգավիճակից գումար վաստակելը, ինչը նախկինում կարող էր հանրային սկանդալ առաջացնել և հանգեցնել հետաքննության, հավելել է NYT-ը։ Թրամփը հիմք է ստեղծել նման վարքագծի համար՝ վերացնելով վերահսկողության և հաշվետվողականության գործիքները, որոնք կարող էին զսպել իր նախորդներին։

Ամերիկյան նախագահը շարունակում է եկամուտ ստանալ նաև որդիների բիզնեսներից, հիշեցնում է թերթը՝ հավելելով, որ իր ընտանիքի ընդհանուր կարողությունը 2025 թվականի մարտին կազմել է ռեկորդային 5.1 միլիարդ դոլար, ինչը 1.2 միլիարդ դոլարով ավելի է նախորդ տարվա համեմատ։

Թրամփը սեփական կրիպտոարժույթի թողարկման մասին հայտարարել է հունվարին Truth Social սոցիալական ցանցում՝ իր երդմնակալության արարողությունից առաջ։ Դրա օրական առևտրի ծավալը, ըստ CoinMarketCap հարթակի, գերազանցել է 11 միլիարդ դոլարը, ինչը, մասնագետների կարծիքով, ցույց է տվել շահութաբերության բացառիկ մակարդակ։