Իմ աղոթքները Կարապետյանների ընտանիքի հետ են. Միքայել Մինասյան
Սուրբ Աթոռում ՀՀ նախկին դեսպան Միքայել Մինասյանն իր աջակցությունն է հայտնել գործարար Սամվել Կարապետյանին.
«Հին արևելյան ասացվածքը՝ «Ոչ մի բարի գործ անպատիժ չի մնում», ունի իր բացատրությունը. չար ուժերը պայքարում են բարի գործերի դեմ՝ դրանք կանխելու կամ քարկոծելու և արժեզրկելու համար: Ինչո՞ւ: Որովհետև դրանք չար ուժեր են:
Այսօր Մայր Աթոռ Սուրբ Էջմիածնի տոնն է՝ հայերի հոգևոր, պատմական և շատ դեպքերում՝ միակ կենտրոնը:
Այսօր Մայր Աթոռ Սուրբ Էջմիածնի պատմության մեծագույն բարերարներից մեկը բանտում է:
Իմ աղոթքները Կարապետյանների ընտանիքի հետ են, թող նրանք կարողանան արժանապատվորեն անցնել այս փորձությունը, և Սամվելը, կարծում եմ, իմ աղոթքների կարիքը չունի, քանի որ իր գործերի համար պահապան հրեշտակները կպաշտպանեն նրան և հաղթանակ կպարգևեն:
Մենք բոլորս անցնում ենք բյուրեղացման և մաքրագործման դժվարին ճանապարհով՝ անհատապես և համատեղ: Մենք անցնում ենք մեծ կորուստների և բազմաթիվ զոհերի միջով. բոլորը հասկանում են, թե ինչ է պատահել, և ամենակարևորը՝ ինչ է կատարվում հիմա: Նրանք, ովքեր չեն հասկանում, դեռ պետք է անցնեն իրենց սեփական քավարանով:
Իհարկե, դա հեշտ չէ, բայց մյուս կողմից՝ գուցե մեզ բոլորիս էլ անհրաժեշտ է այս մաքրագործումը, գուցե սա մեր փրկության ճանապարհն է, գուցե եկեղեցին էլ դրա կարիքն ունի. ի վերջո այն հիմա մաքրագործվում և զորանում է՝ դիմադրելով սատանային։
Շնորհավորում եմ Մայր Աթոռ Սուրբ Էջմիածնի տոնը։ Թող Մայր Աթոռը մնա անսասան, իսկ Սամվել Կարապետյանը, բարերարից վերածվելով մեր հավատքի և եկեղեցու պաշտպանի, շարունակի իր առաքելությունը և, հաղթելով չարիքին, մեզ առաջնորդի դեպի լույսը», – գրել է նա:
