Վերջերս նույնիսկ ամենախուլերն ու կույրերը սկսել են նկատել, որ Ադրբեջանը մի շարք դեպքերում թշնամաբար է տրամադրված ՌԴ շահերի նկատմամբ. Զատուլին
Ադրբեջանական գազ Ուկրաինային մատակարարելու որոշումը հստակորեն ուղղված է Մոսկվայի դեմ պատերազմող Կիևին աջակցելուն․ Лента.ru-ի հետ զրույցում նշել է Պետդումայի ԱՊՀ հարցերով հանձնաժողովի նախագահի առաջին տեղակալ Կոնստանտին Զատուլինը:
«Ինձ թվում է՝ որոշ ժամանակ է, ինչ նույնիսկ ամենախուլերն ու կույրերը սկսել են նկատել, որ Ադրբեջանը հետապնդում է իր սեփական գիծը, և մի շարք դեպքերում թշնամաբար է տրամադրված Ռուսաստանի շահերի նկատմամբ։ Սա ևս մեկ հաստատում է, որ Բաքուն փնտրում է պատճառներ և առիթներ՝ իր վերաբերմունքը ցույց տալու համար», – նշել է Զատուլինը։
Պատգամավորը հավելել է, որ Ադրբեջանում նման քայլերը կարող են անվանել բազմավեկտոր քաղաքականություն, սակայն վերջերս Ռուսաստանի քաղաքականությանն ուղղահայաց վեկտորներն ավելի ու ավելի են ամրապնդվում և ցուցադրվում։
«Սա չի նշանակում, որ Ադրբեջանը հրաժարվում է հնարավորության դեպքում օգուտ փնտրել Ռուսաստանի հետ հարաբերություններում։ Այո՛, դա անում է։ Սակայն Ռուսաստանի հետ օգուտ փնտրելը երկրորդական գործոն է ադրբեջանական քաղաքականության մեջ։ Առաջնային նպատակն է դիրքավորել իրեն որպես մի երկիր, որը Ռուսաստանի հետ վարվում է առնվազն ոչ որպես դաշնակից, որը ոչ մի կերպ չի սահմանափակում իրեն նրա հակառակորդների և թշնամիների հետ հարաբերություններում։ Ցավոք, ոչ բոլորն են դա հասկանում», – նշել է Զատուլինը։
Քաղաքական գործչի խոսքով՝ Ռուսաստանը պետք է աջակցի վարչապետ Միխայիլ Միշուստինի մոտեցմանը, որը Միխայիլ Գուսմանին ազատել է ՏԱՍՍ-ի ղեկավարի առաջին տեղակալի պաշտոնից։
«Հակառակ դեպքում, մեր տեղեկատվական քաղաքականության արդյունքում, պարզվում է, որ Ադրբեջանը մեծապես նպաստել է Իրանի դեմ ագրեսիայի սկսվելու ժամանակ մեր կինոգործիչներին Իրանից դուրս բերելու հարցում։ Սա բոլորին և ամենուրեք ասվել է։ Բայց այն փաստի մասին, որ Ադրբեջանը թույլ չի տվել Բուշերի ատոմակայանի ռուս մասնագետների ընտանիքներին մուտք գործել, ոչ ոք ոչինչ չգիտի», – եզրափակել է զրուցակիցը։
Ավելի վաղ հայտնի էր դարձել, որ Ուկրաինան ադրբեջանական գազի ներմուծման առաջին համաձայնագիրն է կնքել։ Գազը կմատակարարվի Բուլղարիայի և Ռումինիայի միջոցով։
