Ընտրություններին ընդառաջ Փաշինյանը սկսել է մաքրել քաղաքական դաշտը այլախոհներից և կրոնական շրջանակների ամենակարկառուն ներկայացուցիչներից․ Известия
Փորձագետների կարծիքով՝ Հայ Առաքելական եկեղեցու հոգևորականության վրա Հայաստանի իշխանությունների հարձակումները կարող են նոր բողոքի ցույցեր առաջացնել հանրապետությունում. գրել է Известия-ն։
Մասնավորապես, հունիսի 25-ին ձերբակալվել է «Սրբազան Պայքար» շարժման առաջնորդ արքեպիսկոպոս Բագրատ Գալստանյանը։ Ավելի վաղ Հայաստանում ձերբակալվել էին հոգևորականության մի քանի այլ ներկայացուցիչներ, ինչպես նաև ռուսաստանաբնակ հայ գործարար, «Տաշիր» ընկերությունների խմբի նախագահ Սամվել Կարապետյանը։
Ինչպես ընդգծվել է, Հանրապետությունում քաղաքական իրավիճակն ակնհայտորեն վատթարանում է։ Վարչապետ Նիկոլ Փաշինյանն արդեն իսկ իր հակառակորդների գործողություններն անվանել է «հեղաշրջման փորձ»։ Նրանք, իրենց հերթին, խոսում են 2026 թվականին նախատեսված խորհրդարանական ընտրությունների նախօրեին ընդդիմության հետապնդումների մասին։
«Կառավարության և եկեղեցու միջև պառակտումն ակնհայտորեն կխորանա։ Երկխոսություն հաստատելու նախադրյալներ դեռևս չկան։ Վարչապետ Նիկոլ Փաշինյանի և կաթողիկոս Գարեգին Երկրորդի միջև հակամարտությունը դարձել է շատ լայն և բացահայտ։ Կարծում եմ, որ Գալստանյանի կալանավորումը ևս մեկ կաթիլ է ընդդիմության համբերության բաժակի մեջ։ Բողոքի ցույցեր հնարավոր են։ Ոչ թե կոնկրետ Գալստանյանի պատճառով, այլ՝ ընդհանրապես Փաշինյանի քաղաքականությունից դժգոհության պատճառով», – Известия-ի հետ զրույցում նշել է փորձագետ Միլան Լազովիչը։
Ավելի վաղ հանրության հատուկ ուշադրությանն էր արժանացել մեկ այլ ձերբակալություն՝ «Տաշիր» ընկերությունների խմբի ղեկավար, հայազգի ռուսաստանցի գործարար Սամվել Կարապետյանի ձերբակալությունը։ Հունիսի 18-ին նրան մեղադրանք է առաջադրվել իշխանությունը զավթելու հրապարակային կոչ անելու համար։ Կարապետյանը չի ընդունում մեղքը, իսկ նրա փաստաբանները պնդում են գործի քաղաքական բնույթի վրա։ Դեպքը հատկապես սրվում է այն փաստով, որ Կարապետյանը Հայ Առաքելական եկեղեցու խոշորագույն բարերարներից մեկն է, որի հետ Փաշինյանի կառավարությունը վերջին տարիներին մշտական հակամարտություն է ունեցել։
Չնայած հանրապետությունը պաշտոնապես մնում է աշխարհիկ պետություն` երկրի Սահմանադրությունը ամրագրում է ՀԱԵ-ի հատուկ դերը որպես ազգային եկեղեցի։ Այնուամենայնիվ, Փաշինյանի օրոք եկեղեցու հետ հարաբերությունները կտրուկ սառել են. ՀԱԵ-ն անընդհատ քննադատում է կառավարության քաղաքականությունը՝ հատկապես արտաքին քաղաքականության և Ադրբեջանին զիջումները։
Բացի այդ՝ 2026 թվականին հանրապետությունում նախատեսված են խորհրդարանական ընտրություններ: Չնայած Եկեղեցին չի կարող քաղաքական ուժ համարվել, այն կարող է կոչ անել բնակչությանը աջակցել ընդդիմությանը:
«Առաջին հերթին՝ հարկ է նշել, որ ամեն ինչ, ինչ տեղի է ունենում, Հայաստանի ներքին գործն է։ Սակայն դրսից թվում է, թե սա, անշուշտ, կապված է Հայաստանում առաջիկա խորհրդարանական ընտրությունների հետ, որոնք նախատեսված են հաջորդ տարի։ Թվում է, թե իշխանություններն ակտիվորեն սկսել են աշխատել ընդդիմության դեմ, ինչը, կոպիտ ասած, նշանակում է քաղաքական դաշտը մաքրել այլախոհ քաղաքական, հասարակական կամ կրոնական շրջանակների ամենաակնառու ներկայացուցիչներից»,- նշել է Միլան Լազովիչը։
