Սպիտակ քաղաքի մոտ տեղի ունեցած երկրաշարժին հաջորդել է 45 հետցնցում, տուժածներ չկան. ՆԳՆ

Այսօր ժամը 09:26-ին Լոռու մարզի Սպիտակ քաղաքից 6 կմ հյուսիս-արևելք տեղի ունեցած երկրաշարժին այս պահի դրությամբ հաջորդել է 4 տասնյակից ավելի հետցնցում։ Տեղեկությունը հայտնում է ՆԳՆ խոսնակ Նարեկ Սարգսյանը։

«Մասնավորապես, այս պահի դրությամբ արձանագրվել է 45 հետցնցում, որոնցից ամենաուժեղը՝ 3.2 մագնիտուդով, գրանցվել է Սպիտակից 9 կմ հյուսիս։ Հետցնցումը զգացվել է Լոռու մարզի Սպիտակ, Ստեփանավան և Վանաձոր քաղաքներում՝ 2-3 բալ ուժգնությամբ»,-նշել է նա։

Սարգսյանն ընդգծել է, որ հետցնցումային ակտիվությունը որոշ ժամանակ կշարունակվի։

Նա հորդորել է խուճապի չմատնվել, պահպանել հանգստություն և հետևել պաշտոնական հաղոդագրություններին։

«Ժամը 12։30-ի դրությամբ ՆԳՆ Փրկարար ծառայության Ճգնաժամային կառավարման ազգային կենտրոն Գյումրի և Արթիկ քաղաքներից ստացվել է 2 ահազանգ։ Գյումրիում, ըստ նախնական տվյալների, փլուզվել է վթարային տան երկշերտ պատի արտաքին շերտը՝ մոտ 2քմ։ Արթիկում, ըստ նախնական տվյալների, շենքերից մեկի 5-րդ հարկից ընկել է 2 քար։ Փրկարարները հեռացրել են թուլացած ևս 2 քար»,- նշել է նա։

ՀՀ ՆԳՆ խոսնակը նաև հայտնել է, որ այս պահի դրությամբ տուժածներ չկան, փլուզումների՝ երկրաշարժի հետ կապված լինելու հանգամանքները ճշտվում են։