Թրամփն ու Զելենսկին հեռախոսազրույց են ունեցել
ԱՄՆ նախագահ Դոնալդ Թրամփն ու Ուկրաինայի նախագահ Վլադիմիր Զելենսկին հեռախոսազրույց են ունեցել․ հայտնել է Զելենսկին իր տելեգրամյան ալիքում։
«Արդյունավետ զրույց ունեցա նախագահ Թրամփի հետ։ Հիմնականը, իհարկե, պատերազմի ավարտն է։ Մենք շնորհակալ ենք Միացյալ Նահանգների նախագահին արդար և երկարատև խաղաղությանն ուղղված իր բոլոր ջանքերի համար»,- ասել է նա։
Զելենսկին հայտնել է, որ Թրամփի հետ խոսել են Ռուսաստանի դեմ պատժամիջոցների մասին։
«Մենք քննարկեցինք համատեղ եվրոպական որոշումներ, որոնք կարող են օգնել մեր պաշտպանությանը։ Այժմ մենք ունենք որոշումներ Նիդեռլանդներից, Շվեդիայից, Նորվեգիայից և Դանիայից՝ ավելի քան մեկ միլիարդ դոլար ամերիկյան զենքի համար, որը Ուկրաինան կստանա։ ՆԱՏՕ-ի երկրների հետ այս փոխգործակցությունը կշարունակվի։ Մենք նաև խոսեցինք Ամերիկայի հետ մեր երկկողմ պաշտպանական փոխգործակցության մասին։ Ուկրաինական կողմն արդեն պատրաստել է անօդաչու թռչող սարքերի վերաբերյալ համաձայնագրի նախագիծը, մենք պատրաստ ենք այն մանրամասն քննարկել և կնքել»,- գրել է Ուկրաինայի նախագահը։
